…nu gifft dat uns Osterfehntjer Spölkoppel all twintig Jahr:
In´t Harvst 1998 harrn Elvira Tinnemeyer, Gudrun Lange, Ilona Feldmann un ik, AndreeWinkler, de Idee en plattdütske Theaterkoppel to grünnen!.
In de 60er un 70er Jahrn, de man plattdütske Theater in Osterfehn groot schrieven. De Gesangverein „Feierabend“ hett völ plattdütske Stücke bi Bilker
up de Bühne brocht. Noch vandag proot man van Hinni Willms, Evert Tinnemeyer
un Grete Pranger, um blot´n paar Lü to nömen. Heel spietelk was´t , as dat Theater spölen in Osterfehn, inslaapen is…
Wi meenten dann, nau bald twintig Jahr muß plattdütske Theater in Osterfehn d´weer her. Aber dat was garnich so enfach: Wo maakt man dat, un wor spölen wi? Un woher de fehlende Spölers nehmen? Nadem wi Marlies Gerdes, Michael
Hagemann, Alfred Kramer un Martin Cramer( en erfahrene Spööler van de
oll Theaterkoppel) övertügen kunnen, gung dat los. Toerst wull wi Anfang Märt
in`t Middendörp Scholl spölen, aber dann wurr uns moije Gulfhus an`t Leda Jümme Weg umbaut un somit hem wi dat erste Theaterstück in d´ Oktober umleggt. De Gemeen hett`nen heel Büld an daun, dat dat Gulfhus gau klar wurr. Un wi kunnen dann pünktlich as Uptakt to`t alljahrlke Straatenfest in Oktober 1999, uns erste Theaterstück up de Bühne brengen. De Titel van uns erste Stück was „Dat Glück wohnt up de Deel „ van Helmut Schmidt.
Wi bünt mit sess Vörstellungen anfangen, vandag spölen wi dartein mal. Besten Dank an disse Stee an uns Tokiekers, de uns immer weer stönen .
Uns Koppel is dann stüttig grooter worden: In´t Jahr 2000 hem dann
Harald Tinnemeyer, Henny Meyer un Marlis Kramer mitspölt. 2001 keem dann
Helga Pieper dr´to. 2003 kreeg wi dann mit Maike Tinnemeyer un Tim Brunken
„Nachwuchs“. 2004 harrn wi weer en Winst mit Heinz Bohlen. Dann bünt de noch Andre´Helmers un Silke Behnen dr´to komen!
Dat trurigste Jahr was 2013, als uns Lid Marlis Kramer strüven is
Mit Sontje Winkler, Marie Luise Cramer, Tomke Dänekas un Frank Schmidt hemt wi in de ledzte twee Jahr en „Verjüngungskur“ maakt! Dat maakt´nen büld Spaß de „oll Hasen“ un de „Frischlinge“ to to kieken!
Christel Cramer is van Anfang an uns Stönpahl.
Ok van Anfang an, maken Marlis Peper un Theo Engberts de Pausenbewirtung!
De Technik is in de beste Hannen van Helmut Santjer un Michael Behnen!
Völ Arbeit nehmen uns ok uns Frolü un Manlü achter de Kulissen off.
Disse heele Koppel is de „Osterfehntjer Spölkoppel“.
Un mi maakt dat heel blied van disse Koppel all siet twintig Jahr, de Spölbaas to wesen!
Andree Winkler