Worüm geiht dat in dat neije plattdütsk Theaterstück:

„Mannlüdröm, Drömmannlü“

In Langholt, sall dat 705- jahrige Bestahn van Langholt groot fiert worden.
Veer Langholter Froolü un dree Mannlü, hemt sük överleggt, dorto en Theaterstück up de Bühn to brengen. Dat sall wat Klassisches wesen, van Goethe oder so, denn de anner Theaterkpoppels, van Osterfehn un Umgevung, spölen ja all genoog Klamauk. (Tsss, wat bilden de sük woll in!)
De dree Mannlü, Adsche (Andree Winkler), Hinni (Alfred Kramer) un Udo (Volker Oltmanns), hemt dat bi hör Froolü, Netti (Elvira Tinnemeyer), Meike (Gudrun Lange) un Claudia (Simke Winkler) nich licht. Se worden van hör Froolü unnerdrückt un schikannert. Dorum nutzen de Mannlü, elke Gelegenheit um sük en bietje Freetied van hör Froolü to verschaffen. Dat klassische Theaterstück kummt hör recht gelegen. Se planen en Reis nau Italien, um sük up de Spuren van Goethe to begeven. Wahrhaftig willn´ se aver nau Hambörg up de Reeperbahn. De Froolü komen Twiefels up, se troen de Saak nich un beschluten de Mannlü blieven tohus un kriegen nett as „Aschenputtel“ en Büld Arbeid updraagen, dormit hör nich langwielig word. As de Froolü offreist bünt, maken sük de Mannlü up de Weg nau Hambörg.
De Fründin van de dree Froolü, Single Linda, (Sontje Janssen) hett garkien Buck up en klassisch Theaterstück un will lever en Schlager Musical upföhrn. Off se sük dörsetten kann?
Up jeden Fall, as de dree Mannlü ut Hambörg torügg bünt, breckt dat Chaos ut, worbi de ukrainische Sniederske Anna (Heike Wienberg/Marie Luise Cramer) ok kien groode Hülp leisten kann:
De Bardamen, de de Mannlü in Hambörg kennenlehrt hemt, statten Adsche, Hinni un Udo, unveracht en Besöök off. As de Fröölü torügg komen, finnen se en van de Damen (Tomke Lübbers) in de Badwann´…. Aver ok de Froolü kriegen unverwacht Besöök van hör Drömmannlü ut Italien, en dorvan is de heete Salvatore (Frank Schmidt), en Vereehrer van Netti…
Off de Mannlü van nu off an in Keller slapen muttn, oder off se nu weer dat Regiment övernehmen, off dat nu en klassisch Theaterstück van Goethe oder en Schlager Musical in Langholt upföhrt word, dat wart ji gewahr, wenn ji gau Intreekarten bi Esders koopen un de Osterfehntjer Spölkoppel besööken.

Völ Plaiseer